ល្បីខ្មោច បំពេរកូនលងបន្លាច ប្រជាជននៅ អូរមួយក្បែរភូមិ នៅខេត្តប៉ៃលិន

ខេត្តប៉ៃលិន៖ បើសិនជាមានគេនិយាយរៀបរាប់រឿងខ្មោចព្រាយបិសាចប្រាប់ដល់ក្មេងតូចៗដែលកំពុងជួបជុំគ្នានៅកន្លែងណាមួយនោះ គឺពួកគេតែងតែអង្គុយឬឈរសម្ងំចំហមាត់ចាំស្តាប់យ៉ាងប្រុងប្រយ័ត្ន និងយកចិត្តទុកដាក់បំផុត ទោះបីជារឿងនោះពិតឬជារឿងនិទានបែបកុហកក៏ដោយ ថែមទាំងធ្វើឱ្យពួកគេម្នាក់ៗមានអារម្មណ៍ថាភ័យខ្លាចរហូតព្រឺរោមដៃជើងផងដែរ ។ទាក់ទិនទៅនឹងបញ្ហាទាំងនេះ មានអ្នកខ្លះជឿថា ពិតជាមានខ្មោចព្រាយបិសាចមែន តែក៏មានអ្នកខ្លះទៀតអត់ជឿទាល់តែសោះថាមានខ្មោច ព្រោះមើលអត់ឃើញ ហើយក៏មានតែនៅក្នុងខ្សែភាពយន្តដែលគេនិពន្ធឡើងប៉ុណ្ណោះ ។ មិនដឹងថា អស់លោកអ្នកមានយោបល់បែបណាជុំវិញការផ្សាយព័ត៌មានពីខ្មាចព្រាយបិសាចនេះ ឡើយ ទោះបីជាបែបណា នេះគ្រាន់តែជារឿងភ្ញាក់ផ្អើលដែលបានកើតឡើងប៉ុណ្ណោះ